Zec 14 | MEU | STEP | A itaia, Iehova ena dina na e maimu; una dina ai emui amo e dadi oho kohudia na bogaragimui ai ma bae heharilai.

Zechariah 14

Iehova ena dina

1 A itaia, Iehova ena dina na e maimu; una dina ai emui amo e dadi oho kohudia na bogaragimui ai ma bae heharilai. 2 Badina be basileia iboudiai baina haboudia, Ierusalem bae tuari henia totona; bena hanua na bae abia, ruma kohudia na bae dadi, bona hahine na bae hadikadia; a taunimanima oredia na hanua amo basie henege daure. 3 Bena Iehova baine raka lasi, unu basileia na baine tuari henidia, tuari dinana ai e tuarimu na heto. 4 Una dina ai, ia aena na Olive ororona, Ierusalem vairanai, mairiveina kahana ai e miamu ḡauna, latanai bae hahedai; bona Olive ororona baine hepola parara, laurabada kahana amo ela bona lahara kahana; koura mai lababana ta baine hekara. Taunabunai Ororo kahana ta na mirigini kahana bainela, bona kahana ta na diho kahana bainela. 5 Egu ororo kourana na baine hekou ahu; badina be ororo kourana ese ia ohena ai baine hetomu kau. Bena umui na ba heau oho, Usia, Iuda pavapavana, ena nega ai tano laḡa o heautania na heto. Bena Iehova, emui Dirava, bainema bona helaḡa taudia iboudiai danu ia ida.

6 Una dina ai keru eiava paraka mavamavana basie vara. 7 Bena diari na baine hesiriu hanaihanai (Iehova na mai dibana), dia dina bona dia hanuaboi; ena be dina baine diho to diari na baine mia.

8 Una dina ai, mauri ranudia na Ierusalem lalona amo bae aru lasi, kahana na laurabada kahana davarana ai bae aru lasi, ma kahana na lahara kahana davarana ai; bae aru hanaihanai, siahu negana ai bona keru negana ai danu.

9 Bena Iehova ese tanobada idoinai baine pavapavaia; una dina ai Iehova na baine tamona bona ia ladana danu baine tamona.

10 Tano idoinai na taora ai baine hahelao, Geba amo ela bona Rimon, Ierusalem diho-kahana ai. A Ierusalem na atai ai baine mia, gabana korikorina ai, Beniamina Ikoukouna amo ela ikoukou gunana, ela bona Daiguni Ikoukouna, bona Hananele Kohorona ela bona pavapava ena vine itaolaidia gabudia. 11 Bona haida ese bae noholaia, badina be hevadari basine mia; Ierusalem taudia na bae noho namonamo, asi garidia.

12 Bena Ierusalem bae tuari henia besedia iboudiai na Iehova ese ina dai-hanai gorerena amo baine hahisidia: ginidia ai hidiodia bae pata, bona kwaradia ai matadia bae pata, bona ududia ai maladia bae pata. 13 Una dina ai gari bada-hereana Iehova ena amo na idia latadiai baine kau, bena ta ta ese bamona bamona imadia bae abi, bona ta ta ese imadia bae abi isi, bamodia ihadikadia totona; 14 Iuda ese danu Ierusalem baine tuari henia. Bena heḡeḡemadai besedia iboudiai edia taḡa na bae haboudia,gold bonasilver bona dabua momo herea. 15 Bena dai-hanai gorerena ta, hari gorere heḡereḡerena na hosi bona doniki badadia bona kamelo bona doniki maraḡidia, bona ubu-ubu ḡaudia dahaka dahaka unu taruha lalodiai bae mia, latadiai baine kau.

16 Bena roho-mauri taudia iboudiai, unu Ierusalem vada e tuari henia besedia idau-idau iboudiai amo, na laḡani ta ta ai Ierusalem bae dara dae, Ḡaubada, Iehova Sabaota, itomadiho-henina bona kalaga ariana ibadinana totona. 17 A tanobada iduhudia haida na Ḡaubada, Iehova Sabaota, itomadiho-henina totona Ierusalem basiema dara dae, medu na idia latadiai basie diho. 18 Bona Aigupto taudia danu basiema dara dae, unuseni ai basiema hedinarai, bena Iehova ese kalaga ariana ibadinana totona asie dara daemu besedia e hahisilaidiamu gorerena na idia danu latadiai baine kau. 19 Aigupto davana bona kalaga ariana ibadinana totona asie dara daemu besedia iboudiai davadia na unu bae abi toma.

20 Una dina ai hosi aiodia gabagabadia ai ina revareva bae torea: “Helaḡa, Iehova ena”. Bona Iehova ena dubu ai bae mia urodia na ihaboulaina patana vairanai e miamu naudia heḡereḡeredia ai baela. 21 Uro iboudiai Ierusalem ai bona Iuda ai na bae helaḡa, Iehova Sabaota enai; taunabunai edia boubou ḡaudia bae hahelaḡadia taudia iboudiai na baema diba, bae abidia, edia boubou ḡaudia hidiodia na idia lalodiai bae nadudia. Bona hoihoi tauna ta na Iehova Sabaota ena dubu ai basine noho lou una dina ai.